മണ്ണു കുറവ്, പരിചരണം കുറവ്, ഒരുവിധം ഏതു കാലാവസ്ഥയിലും വളരും; കറ്റാർ വാഴക്കൃഷിയാണ് താരം
മണ്ണു കുറവ്, പരിചരണം കുറവ്, ഒരുവിധം ഏതു കാലാവസ്ഥയിലും വളരും; കർഷകർക്കിടയിൽ കറ്റാർ വാഴക്കൃഷിയാണ് താരം. മഞ്ഞുമൂടിയ കാലാവസ്ഥ ഒഴികെ ഏത് കാലാവസ്ഥയിലും ഏത് തരത്തിലുള്ള ഭൂമിയിലും കറ്റാര്‍വാഴ കൃഷി ചെയ്യാം. വളക്കൂറില്ലാത്ത തരിശു ഭൂമിയിലും കല്ലും പാറകളും നിറഞ്ഞ വരണ്ട ഭൂമിയിലും മണല്‍ നിറഞ്ഞ ഭൂമിയിലും ഏത് കൊടിയ വരള്‍ച്ചയിലും വളരുമെന്നതാണ് കറ്റാർ വാഴച്ചെടിയുടെ പ്രധാന മേന്മ.
പരിചരണത്തിനായി വളരെ കുറച്ചു സമയം മതിയെന്ന മെച്ചവുമുണ്ട്. ഇടവിളയായും തനിവിളയായും കറ്റാർ വാഴ കൃഷി ചെയ്യാം. വളരെ കുറച്ചു മണ്ണ് മാത്രമാണ് ഇവയ്ക്ക് ആവശ്യം. കറുത്ത മണ്ണാണ് കറ്റാർ വാഴകൃഷിയ് ഏറ്റവും അനുയോജ്യമെന്ന് അനുഭവസ്ഥർ പറയുന്നു.
ഒരേക്കര്‍ ഭൂമിയില്‍ കൃഷി ചെയ്യാന്‍ ഏകദേശം 15,000 കറ്റാർ വാഴക്കന്നുകള്‍ വേണ്ടിവരും. മണ്ണിന്റെ പി.എച്ച് മൂല്യം 8.5 വരെ ഉയര്‍ന്ന മണ്ണില്‍പ്പോലും ഈ സസ്യം വളരും. 60 സെന്റീമീറ്റര്‍ അകലത്തിലാണ് തൈകള്‍ ഭൂമിയില്‍ നടേണ്ടത്. നടീൽ കഴിഞ്ഞ് 12 മാസം കഴിയുമ്പോള്‍ മുതല്‍ പോള മുറിച്ചെടുത്തു തുടങ്ങാം. ഒരേക്കറില്‍ അടിവളമായി എകദേശം 15 ടണ്‍ കാലിവളം ഉപയോഗിക്കാം.
ഒരേക്കറില്‍ നിന്ന് നാല് ടണ്‍ വരെ പോള ലഭിക്കും. ഒരു വര്‍ഷം മൂന്നു തവണ പോള മുറിച്ചെടുക്കാം. അഞ്ചു വര്‍ഷം വരെ ഒരേ ചെടി തന്നെ വിളവെടുപ്പിനായി ഉപയോഗിക്കാം എന്നതും കറ്റാര്‍ വാഴയുടെ ഗുണമാണ്. രോഗപ്രതിരോധ ശേഷിയുടെ കാര്യത്തിൽ കരുത്തനായ കറ്റാർ വാഴയ്ക്ക് പൊതുവെ കാര്യമായ ആക്രമണകാരികളായ കീടങ്ങളുടെ ഉപദ്രവം ഉണ്ടാകാറില്ല.
പ്രധാനമായും മരുന്ന് ഉല്‍പ്പാദനവുമായി ബന്ധപ്പെട്ടാണ് കറ്റാര്‍ വാഴയുടെ വിപണി. മികച്ച ഒരു സൗന്ദര്യ വര്‍ധക വസ്തുവായും നാട്ടുമരുന്നായും ആയുര്‍വേദ ഔഷധങ്ങളുടെ കൂട്ടായും കറ്റാർ വാഴ ഉപയോഗിക്കുന്നു. കറ്റാര്‍ വാഴയുടെ പോളയില്‍ അടങ്ങിയിട്ടുള്ള 16 ഘടകങ്ങളാണ് വിവിധ മരുന്നുനിര്‍മാണത്തിനായി ഉപയോഗിക്കുക. ആയുര്‍വേദത്തിന് പുറമേ ഹോമിയോ മരുന്നുകള്‍ ഉണ്ടാക്കുന്നതിനും കറ്റാര്‍ വാഴ വ്യപകമായി ഉപയോഗിക്കുന്നുണ്ട്.
Image: pixabay.com
