കർക്കിടകത്തിൽ ഞവരയാണ് താരം; ഞവര കൃഷി ചെയ്യുമ്പോൾ ശ്രദ്ധിക്കേണ്ടത്
കർക്കിടകത്തിൽ ഞവരയാണ് താരം; ഞവര കൃഷി ചെയ്യുമ്പോൾ ശ്രദ്ധിക്കേണ്ടത്. ഔഷധ നെല്ലിനങ്ങളില്‍ പ്രധാനിയായ ഞവരയ്ക്ക് കര്‍ക്കിടമാസത്തില്‍ ആവശ്യക്കാര്‍ ഏറെയാണ്. തെങ്ങിന്‍തോപ്പുകളില്‍ ഇടവിളയായി കൃഷി ചെയ്യാന്‍ അനുയോജ്യമായ വിളയാണ് ഞവര. മാംസ്യത്തിന്റെ അളവ് സാധാരണ ചുവന്ന നെല്ലിനേക്കാള്‍ 17 ശതമാനവും നാരുകളുടെ അളവ് 30 ശതമാനവും കൂടുതലായതിനാൽ പോഷക സമൃദ്ധവുമാണ് ഈ നെൽച്ചെടി.
വിത്തിന്റ പുറംതോടിന്റെ നിറമനുസരിച്ച് കറുത്ത ഞവരയും സ്വര്‍ണ ഞവരയുമുണ്ട്. എന്നാല്‍ കറുത്ത ഇനത്തിലാണ് ഔഷധ മൂല്യം കൂടുതലെന്ന് ആയുര്‍വേദം പറയുന്നു. വടക്കന്‍ കേരളത്തില്‍ വ്യാപകമായി കൃഷി ചെയ്യുന്ന കറുത്ത ഞവരയ്ക്ക് രോഗപ്രതിരോധ ശേഷിയും വരള്‍ച്ചയെ അതിജീവിക്കുന്നതിനുള്ള കഴിവും കൂടുതലാണ്.
ഔഷധമൂല്യം കൂടുമെന്നതിനാൽ ധനു മാസത്തിലാണ് ഞവര നെല്ല് നടുന്നത്. വെള്ളം അധികം കെട്ടിനില്‍ക്കാത്ത ഏതു സ്ഥലത്തും ഞവര കൃഷി ചെയ്യാം. എന്നാല്‍ കൂടുതല്‍ വളര്‍ച്ചയും വിളവും ലഭിക്കാൻ ഞവര പാടത്ത് കൃഷി ചെയ്യുന്നതാണ് നല്ലത്. ഔഷധമൂല്യം കൂടുതൽ ലഭിക്കുക ഇടവിള കൃഷിയിലാണ്.
ഞവര്യ്ക്ക് സാധാരണ നെല്ലിനെ അപേക്ഷിച്ച് വിളവ് കുറവാണെങ്കിലും വിപണിയിൽ ഇരട്ടി വില ലഭിക്കാറുണ്ട്. അതുകൊണ്ട് നിരവധി പേർ നെൽകൃഷിയ്ക്കു പകരം ലാഭകരമായ ഞവര കൃഷി ചെയ്യാറുണ്ട്. ആയുര്‍വേദ ചികിത്സയ്ക്ക് പ്രാധാന്യമുള്ള കര്‍ക്കിടകത്തിലാണ് ഞവരയ്ക്ക് വിപണിയിൽ ഏറ്റവും വില ലഭിക്കാറുള്ളത്.
Also Read: അലങ്കാരത്തിന് ഹരം പകരാൻ നട്ടു വളർത്താം ടോർച്ച് ജിഞ്ചർ