പപ്പായ ടാപ്പിംഗ്; പപ്പായ കൃഷി പണം നേടിത്തരുന്ന വഴികൾ അറിയാം

പപ്പായ ടാപ്പിംഗ്; പപ്പായ കൃഷി പണം നേടിത്തരുന്ന വഴികൾ അറിയാം. റബർ ടാപ്പു ചെയ്യുന്നതുപോലെ പപ്പായയും ടാപ്പ് ചെയ്ത് മികച്ച വരുമാനം നേടാം. വിദേശ വിപണികളിൽ ധാരാളം ആവശ്യക്കാരുള്ള പപ്പായക്കറ എന്ന പപ്പയിൻ വ്യവസായികാടിസ്ഥാനത്തിൽ നിർമിക്കാനുള്ള പദ്ധതി തയ്യാറാക്കുകയാണ് കേന്ദ്ര ശാസ്ത്ര സാങ്കേതിക വകുപ്പ്.

ധാരാളം ഔഷധ മൂല്യമുള്ള പപ്പായ ഒരു ഏക്കറിൽ കൃഷി ചെയ്താൽ പ്രതിമാസം 30,000 രൂപ വരെ വരുമാനം നേടാമെന്ന് കേന്ദ്ര ശാസ്ത്ര സാങ്കേതിക വകുപ്പ് വ്യക്തമാക്കുന്നു. വയനാട്, കാസർകോട്, മലപ്പുറം തൃശൂർ, ഇടുക്കി കൊല്ലം ജില്ലകളിലെ കർഷകർക്ക് കൃഷിയുടെ ആദ്യഘട്ടമെന്ന നിലയിൽ സിന്ത, റെഡ് ലേഡി എന്നീ ഇനങ്ങളിൽപ്പെട്ട പപ്പായ തൈകൾ നൽകാനും പദ്ധതിയുണ്ട്.

പപ്പായ കറ വാങ്ങാൻ പൊള്ളാച്ചിയിലെ ഫൈറ്റോ സൈം കമ്പനിയുമായി ധാരണയായതായും റിപ്പോർട്ടുകൾ പറയുന്നു. പൊള്ളാച്ചിയിൽ ട്രെയിനിംഗ് ലഭിച്ച ഉദ്യോഗസ്ഥരാണ് കൃഷിയിലും ടാപ്പിംഗിലും കർഷകരെ പരിശീലിപ്പിക്കുന്നത്. ഹെക്ടറിന് എൺപതിനായിരം രൂപ വരെ ഹോർട്ടികൾച്ചർ സബ്സിഡി ലഭിക്കുന്ന ഗുണവുമുണ്ട്.

ഒരേക്കറിൽ ആയിരം തൈകൾ വരെ നടാമെന്നതാണ് പപ്പായ കൃഷിയുടെ പ്രത്യേകത. ആറാം മാസം മുതൽ ടാപ്പിംഗ് തുടങ്ങാം. ചെടികളുടെ ചുവടെ പ്രത്യേക പ്ലാസ്റ്റിക് വിരിച്ച ശേഷം കായകളുടെ തൊലിയിൽ സാധാരണ ബ്ലേഡ് ഉപയോഗിച്ച് മുറിവുണ്ടാക്കിയാണ് ടാപ്പിംഗ്. ഒരിക്കൽ കറയെടുത്ത് എട്ട് ദിവസം കഴിഞ്ഞാൽ വീണ്ടും ടാപ്പിംഗ് നടത്താം.



10 ദിവസം വരെ സാധാരണ ഊഷ്മാവിൽ കേടുകൂടാതിരിക്കുന്ന കറ കമ്പനി പ്രതിനിധികൾ ശേഖരിക്കുന്നതുവരെ കുപ്പികളിൽ സൂക്ഷിക്കാം. ഒരു കിലോയ്ക്ക് 120 രൂപവരെ ഈ കറയ്ക്ക് വിലയുണ്ട്. സംസ്കരിച്ച കറയ്ക്ക് കിലോയ്ക്ക് ആറായിരം രൂപവരെ അന്താരാഷ്ട്ര വിപണികളിൽ വില ലഭിക്കും. ആരോഗ്യമുള്ള ഒരു പപ്പായ മരം രണ്ടു വർഷംവരെ തുടർച്ചയായി കറ ചുരത്തും.

കറ എടുത്ത ശേഷമുള്ള പപ്പായ വിൽക്കുകയോ ജാം, സ്ക്വാഷ് പോലുള്ള മൂല്യവർദ്ധിത ഉത്പന്നങ്ങൾ നിർമ്മിക്കാനോ ഉപയോഗിക്കാം. ഒരു കിലോ പപ്പായക്ക് വിപണിയിൽ 50 രൂപ വരെ വില ലഭിക്കാറുണ്ട്. വിറ്റാമിൻ എ, ബി, സി എന്നിവയുടെ കലവറയായ പപ്പായ സൗന്ദര്യവർദ്ധക വസ്തുക്കൾ, ടൂത്ത് പേസ്റ്റ് എന്നിവയുടെ നിർമാണത്തിനും ഉപയോഗിക്കുന്നുണ്ട്.

Also Read: മത്സ്യവും പച്ചക്കറിയും ഒറ്റയടിക്ക് കൃഷി ചെയ്യാം; അക്വാപോണിക്സ് കൃഷിരീതിയെക്കുറിച്ച് അറിയേണ്ടതെല്ലാം

Image: pixabay.com