കോഴിക്കൃഷി നടത്താൻ സ്ഥലപരിമിതിയോ? ഇതാ കോഴി വളർത്തലിന്റെ മട്ടുപ്പാവ് സ്റ്റൈൽ

കോഴിക്കൃഷി നടത്താൻ സ്ഥലപരിമിതിയോ? ഇതാ കോഴിക്കൃഷിയുടെ മട്ടുപ്പാവ് സ്റ്റൈൽ അവതരിപ്പിക്കുകയാണ് കൊല്ലം ജില്ലാപഞ്ചായത്ത്. കോഴിക്കൃഷി ചെയ്യാൻ പലർക്കും താത്പര്യമുണ്ടെങ്കിലും സ്ഥലപരിമിതി തടസമാകുകയാണ് പതിവ്, ഈ സാഹചര്യത്തിലാണ് മട്ടുപ്പാവുകൃഷി എന്ന ആശയവുമായി കൊല്ലം ജില്ലാപഞ്ചായത്ത് രംഗത്തെത്തിയത്.

വെറുതെ വെയിലും മഴയും കൊണ്ട് ആരും തിരിഞ്ഞുനോക്കാതെ കിടന്നിരുന്ന മട്ടുപ്പാവുകളിലേക്ക് അതോടെ കോഴികളുടെ വരവായി. മട്ടുപ്പാവിലെ കോഴിവളർത്തലിന്റെ സാധ്യത മനസ്സിലാക്കിയാണ് ജില്ലാപഞ്ചായത്ത് നഗരവാസികൾക്കായി പുതിയ പദ്ധതി ആവിഷ്കരിച്ചത്. കഴിഞ്ഞ 25 ന് ജില്ലാ വെറ്ററിനറി കേന്ദ്രത്തിൽ മന്ത്രി കെ.രാജു പങ്കെടുത്ത ചടങ്ങിൽ ആൻ എന്ന കർഷകയ്ക്ക് മുട്ടക്കോഴികളെ നൽകി ജില്ലാ പഞ്ചായത്ത് വികസനകാര്യ സ്ഥിരംസമിതി അധ്യക്ഷ ആശ ശശിധരനാണ് പദ്ധതി ഉദ്ഘാടനം ചെയ്തത്.


5,000 രൂപ ഉപഭോക്തൃവിഹിതവും 5,000 രൂപ സർക്കാർ സബ്സിഡിയും എന്ന ധാരണയിലാണ് കോഴിവളർത്തലിനായി മുന്നോട്ടു വരുന്നവർക്ക് ആറ് മുട്ടക്കോഴികളെവീതം നൽകുന്നത്. ഒപ്പം മട്ടുപ്പാവിൽ വളരുന്ന ഇവയ്ക്ക് നൽകാനായി കൂടും ആറുകിലോ കോഴിത്തീറ്റയും അധികൃതർ നൽകുന്നു. ഓരോ തട്ടിലും മൂന്ന് കോഴികളെ പാർപ്പിക്കാവുന്ന വിധം രണ്ട് തട്ടുകളുള്ള കൂട്ടിൽ മുട്ട ശേഖരിക്കാനും കോഴികൾക്ക് വെള്ളം കൊടുക്കാനുമുള്ള സംവിധാനവുമുണ്ട്.

ആദ്യഘട്ടമെന്നനിലയിൽ 40 പേർക്കാണ് കൊല്ലം കോർപ്പറേഷൻ പരിധിയിലുള്ളവർക്കു മാത്രമേ കോഴികളെ നൽകൂ എന്ന നിബന്ധന കാരണം പലരും നിരാശരായി മടങ്ങുകയാണെന്ന് അധികൃതർ പറയുന്നു. എന്നാൽ പദ്ധതിയ്ക്ക് ലഭിക്കുന്ന വൻ സ്വീകാര്യത കണക്കിലെടുത്ത് കൂടുതൽ കർഷകരിലേക്ക് ഇത് വ്യാപിപ്പിക്കാനുള്ള ഒരുക്കത്തിലാണ് അധികൃതർ.

Also Read: തുള്ളിക്കൊരു കുടം പേമാരി, തുള്ളി കുടിക്കാനില്ലത്രെ! പെയ്തിറങ്ങുന്ന മഴവെള്ളം കിണറുകളിലും കുഴൽക്കിണറുകളിലും നിറക്കുന്നതെങ്ങനെ? ചെയ്യേണ്ടത് ഇത്രയും കാര്യങ്ങൾ

Image: pixabay.com