വാഴക്കൃഷിയുടെ പ്രധാനശത്രുവായ നിമ വിരകളുടെ ആക്രമണം വ്യാപകമാകുന്നു; നിയന്ത്രണ മാർഗങ്ങൾ
വാഴക്കൃഷിയുടെ പ്രധാനശത്രുവായ നിമ വിരകളുടെ ആക്രമണം വ്യാപകമാകുന്നു. കേരള കാര്‍ഷിക സര്‍വകലാശാലയുടെ കണ്ണാറ വാഴഗവേഷണകേന്ദ്രം ഈയിടെ നടത്തിയ ഒരു പഠനത്തിൽ നിമ വിരകളുടെ ആക്രമണം വർധിക്കുന്നതായി പറയുന്നു. തീരെച്ചെറുതായ ഇവയെ കണ്ണുകൊണ്ടു കാണാൻ കഴിയാത്തതിനാൽ ആക്രമണം പ്രതിരോധിക്കുന്നതിൽ കർഷകർ പരാജയപ്പെടുകയാണ്.
കണ്ണാറ വാഴഗവേഷണകേന്ദ്രത്തിലെ കീട ശാസ്ത്രവിഭാഗത്തിലെ ഡോ. ഗവാസ് രാഗേഷിന്റെ നേതൃത്വത്തില്‍ നടത്തിയ പഠനത്തില്‍ കേരളത്തില്‍ മൂന്നു തരം നിമ വിരകളുടെ ആക്രമണം പടര്‍ന്നുപിടിക്കുന്നതായി കണ്ടെത്തിയിരിന്നു. വേരുബന്ധക, വേരുതുരപ്പന്‍, വേരുചീയല്‍ എന്നീ മൂന്നിനം നിമ വിരകളെയാണ് ഗവേഷകർ കണ്ടെത്തിയത്.
വേരുബന്ധക നിമ വിരയെ മിക്ക വാഴത്തോട്ടങ്ങളിലും കാണാറുണ്ട്. നല്ല പുഷ്ടിയോടെ നിന്നിരുന്ന വാഴകളുടെ ഇലകള്‍ പെട്ടെന്ന് മഞ്ഞളിച്ച് വാടിനില്ക്കുന്നതാണ് ഇത്തരം നിമ വിരകളുടെ സാന്നിധ്യത്തിന്റെ അടയാളം. ഈ ലക്ഷണം പ്രത്യക്ഷപ്പെടുന്നത് ആക്രമണത്തിന്റെ അവസാനഘട്ടത്തിൽ ആയതിനാൽ വാഴകളെ രക്ഷിക്കാൻ മിക്കപ്പോഴും സാധിക്കാറില്ല.
വേരുതുരപ്പന്‍ നിമ വിരയാകട്ടെ വാഴയുടെ വേരുകളുടെ ഉള്‍ഭാഗം തിന്ന് അവ പൊള്ളയാക്കി അടുത്തടുത്ത വേരുകളിലേക്കും കടന്നുകൂടി അവയേയും നശിപ്പിക്കുന്നു. ഈ വേരുകളുടെ പുറംതൊലി കൈയുറപോലെ വലിച്ചൂരിയെടുക്കാം. വേരുകള്‍ നഷ്ടപ്പെട്ട വാഴകള്‍ ഒരു ചെറു കാറ്റടിച്ചാൽ പോലും വീഴുന്നത്രയും ദുർബലമായിത്തീരുന്നു.
വേരുചീയല്‍ നിമവിര വേരുകള്‍ പൊള്ളയാക്കി ഒടുവില്‍ മാണത്തിലെത്തി അതും കാര്‍ന്നുതിന്നുന്നു. നിമ ബാധയേറ്റ വേരുകള്‍ ചുവന്ന വ്രണമായി ജീര്‍ണിച്ച് നശിക്കുകയാണ് പതിവ്. മാണം അഴുകലിലേക്കു നയിക്കുന്ന ഫ്യൂസേറിയം കുമിള്‍ രോഗമായി മാറാനും ഇടയുണ്ട്.
മണല്‍ കലര്‍ന്ന മണ്ണിലാണ് നിമയുടെ ആക്രമണം കൂടുതലും കാണപ്പെടുന്നത്. അതിനാൽ ശീമക്കൊന്നയില, കമ്യൂണിസ്റ്റ് പച്ച എന്നിവ അടിവളമായും, ഇടയ്ക്കിടയ്ക്ക് മണ്ണടുപ്പിക്കല്‍ നടത്തുമ്പോഴും ഇട്ടുകൊടുക്കണം. മിത്ര കുമിള്‍ കള്‍ച്ചറായ പേസിലോ മൈസസ് ലൈലാസിനസ് 20 ഗ്രാം ഒരു ലിറ്റര്‍ വെള്ളത്തില്‍ കലക്കി ഇടയ്ക്കിടയ്ക്ക് വാഴ ചുവട്ടില്‍ ഒഴിക്കുന്നതും ഗുണം ചെയ്യും.
വാഴത്തോട്ടത്തില്‍ നെടുകെയും കുറുകെയും ബന്ദിപ്പൂ നട്ടു വളര്‍ത്തുകയാണ് മറ്റൊരു പ്രതിരോധ മാർഗം. ആവര്‍ത്തന കൃഷി, കുറ്റിവിളക്കൃഷി എന്നിവ ഒഴിവാക്കുക. വാഴക്കന്നുകള്‍ നന്നായി ചെത്തിയൊരുക്കി ചാണകപ്പാലില്‍ മുക്കി ഉണക്കി നടാനും ശ്രദ്ധിക്കുക. ചെത്തിയൊരുക്കിയ വാഴക്കന്നുകള്‍ തിളച്ച വെള്ളത്തില്‍ 30 സെക്കന്റ് മുക്കിയെടുക്കുകയോ, 50 ഡിഗ്രി ചൂടുവെള്ളത്തില്‍ 15 മുതല്‍ 20 മിനിട്ടു നേരം മുക്കിവക്കുകയോ ചെയ്തതിനുശേഷം മാത്രം നടുക.
മിത്ര കുമിളായ പേസിലോമൈസസ് ലൈലാസിനസും സ്യൂഡോമോണാസ് ഫ്‌ളൂറിസെന്‍സും 12.5 ഗ്രാം വീതം കലർത്തി ഒരു ലിറ്റര്‍ വെള്ളത്തില്‍ ചേർത്ത് ഇടയ്ക്കിടെ ചുവട്ടില്‍ ഒഴിച്ചുകൊടുക്കുക. കാര്‍ട്ടാപ്പ് എന്ന കീടനാശിനി 20 ഗ്രാം വീതം തടത്തിലിട്ട് നനച്ചുകൊടുത്താൽ നിമ വിരകളെ പൂർണമായും തുരത്താം.
