മുട്ടക്കോഴികൾക്കുള്ള മഴക്കാല പരിചരണം; ശ്രദ്ധിക്കേണ്ട കാര്യങ്ങൾ ഇവയാണ്
മുട്ടക്കോഴികൾക്കുള്ള മഴക്കാല പരിചരണം; ശ്രദ്ധിക്കേണ്ട കാര്യങ്ങൾ ഇവയാണ്. മഴക്കാലത്ത് അന്തരീക്ഷ ഊഷ്മാവ് താഴ്ന്നിരിക്കുന്നതും ഈർപ്പത്തിന്റെ അളവ് കൂടുന്നതും കോഴികളെ പലതരത്തിൽ ബാധിക്കുന്നു. ഇക്കാലത്ത് രോഗങ്ങളും പൊതുവെ കൂടുതലായിരിക്കും. അതിനാൽ മഴക്കാലത്ത് മുട്ടയിടുന്ന കോഴികൾക്ക് പ്രത്യേക പരിചരണം ആവശ്യമാണ്.
മഴ നനയാത്ത, ഈർപ്പം കുറഞ്ഞ സ്ഥലത്തേക്ക് കോഴിക്കൂട് മാറ്റി സ്ഥാപിക്കണം. കോഴിക്കൂട്ടിൽ വീണു കിടക്കുന്ന കാഷ്ടം ഇടയ്ക്കിടെ ഇളക്കി ഈർപ്പം അകറ്റുവാൻ ശ്രദ്ധിക്കണം. ഇങ്ങനെ ചെയ്യുമ്പോൾ കുമ്മായം 100 ചതുരശ്ര അടിക്കു മൂന്നു കിലോഗ്രാം എന്ന തോതിൽ ചേർക്കുന്നതും നല്ലതാണ്.
ബ്ലീച്ചിങ് പൗഡറോ വെള്ളം ശുചിയാക്കുന്നതിന് മാർക്കറ്റിൽ ലഭ്യമായ മറ്റ് അണുനാശിനികളോ ഉപയോഗിച്ച് ശുദ്ധീകരിച്ച വെള്ളം മാത്രം കോഴികൾക്ക് കുടിക്കാൻ കൊടുക്കുക. തീറ്റച്ചാക്കുകൾ നിലത്തുവക്കാതെ മരപ്പലകയുടെയോ ഇരുമ്പു പലകയുടെയോ മുകളിൽ സൂക്ഷിച്ചാൽ ഈർപ്പം മൂലമുണ്ടാകുന്ന പൂപ്പൽ ബാധയേൽക്കാതെ രക്ഷപ്പെടാം.
മഴക്കാലത്ത് പകൽ വെളിച്ചം കുറവായിരിക്കുന്നതിനാൽ മുട്ടക്കോഴികളിൽ മുട്ടയുൽപാദനം കുറയാറുണ്ട്. അതിനാൽ കോഴിക്കൂട്ടിൽ ആവശ്യത്തിന് വെളിച്ചം ലഭ്യമാവാൻ ഫ്ലൂറസെന്റ് ലൈറ്റുകൾ ദിവസം 16 മണിക്കൂർ എന്ന തോതിൽ കത്തിച്ചിടണം. ചൂട് നിലനിർത്തുന്നതിനായി കോഴിക്കൂടിന്റെ ഭാഗികമായി തുറന്ന ഭാഗങ്ങളിൽ കർട്ടനുകൾ ഉപയോഗിക്കാം. വിരമരുന്നുകൾ, പ്രതിരോധ കുത്തിവയ്പുകൾ എന്നിവ ഡോക്ടറുടെ നിർദേശപ്രകാരം കൃത്യമായി നൽകാനും ശ്രദ്ധവക്കണം.
Also Read: 3,000 തൈകളില്‍ നിന്നും 30,000 ചെടികളിലേക്ക് വളരാൻ 3 വർഷം; ഊട്ടിയിൽ നിന്നൊരു സ്ട്രോബറി വിജയഗാഥ
Image: pixabay.com