Notice: Undefined property: stdClass::$pages in /home/content/n3pewpnaspod01_data01/72/3588572/html/wp-content/plugins/search-engine-visibility/classes/plugin.php on line 128
മാലിന്യം വീടുകളില്‍ തന്നെ സംസ്കരിച്ച് കൃഷിക്കാവശ്യമായ വളമാക്കി മാറ്റിയെടുക്കാം – മണ്ണിലേക്ക്, മണ്ണിനെ അറിഞ്ഞ മനുഷ്യനിലേക്ക്.

മാലിന്യം വീടുകളില്‍ തന്നെ സംസ്കരിച്ച് കൃഷിക്കാവശ്യമായ വളമാക്കി മാറ്റിയെടുക്കാം

മാലിന്യം കൈകാര്യം ചെയ്യുക എന്നത് ഒരു വെല്ലുവിളിയായി മാറിയ കാലത്താണ് നമ്മളെല്ലാവരും ജീവിക്കുന്നത്. ജൈവവും അജൈവമായതുമായ ഖര, ദ്രാവക മാലിന്യങ്ങളുടെ സംസ്‌കരണം കൃത്യമായ സംവിധാനങ്ങളിലൂടെ നടപ്പാക്കിയില്ലെങ്കില്‍ അവ ഒരു സാമൂഹിക വിപത്തായി മാറുമെന്നകാര്യത്തില്‍ സംശയമില്ല. അവരവരുടെ വീടുകളില്‍പ്പോലും സംസ്‌കരിക്കുകയും വളമായി ഉപയോഗപ്പെടുത്തുകയും ചെയ്യാവുന്ന മാലിന്യങ്ങള്‍ പോലും കവറുകളിലാക്കി വഴിവക്കത്തും, കൃഷിയിടങ്ങളിലും മറ്റു സ്ഥലങ്ങളിലും നിക്ഷേപിക്കുന്ന ബുദ്ധിശൂന്യമായ പ്രവണത ഈ പ്രതിസന്ധികളുടെ ആക്കം കൂട്ടുകയും സാംക്രമികരോഗങ്ങളുടെ വ്യാപനത്തിന് കളമൊരുക്കുകയും ചെയ്യുന്നു എന്നാണ് വിദഗ്ദരുടെ അഭിപ്രായം. മാലിന്യം ഒരു വിപത്തായ മാറാതെ അവയെ കൃഷി ആവശ്യങ്ങള്‍ക്ക് സഹായകമായ വിധത്തിലൊരു വിഭവമാക്കി മാറ്റിയെടുക്കുകയും ചെയ്യാം എന്ന പുതിയ ചിന്തകള്‍ പ്രത്യാശകള്‍ പകരുന്നുണ്ട്. കമ്പോസ്റ്റിംഗ് എന്ന മാര്‍ഗത്തിലൂടെ ആഹാരാവശിഷ്ടങ്ങളും മത്സ്യ-മാംസാവശിഷ്ടങ്ങളും പച്ചക്കറികളുടെ അവശിഷ്ടങ്ങളും ചെടികള്‍ക്കും കൃഷിക്കും ആവശ്യമായ വളമാക്കി മാറ്റിയെടുക്കാം കൂടാതെ കുറഞ്ഞ ചിലവില്‍ മാലിന്യ സംസ്‌കരണ പ്ലാന്റുകള്‍ വീടുകളില്‍ തന്നെ നിര്‍മ്മിച്ച് പാചകവാതകം കൂടി നിര്‍മ്മിക്കാം എന്ന സാധ്യതയും നിലനില്‍ക്കുന്നു.

കുഴി കമ്പോസ്റ്റ്

വീട്ടുവളപ്പിലോ കുഴികള്‍ എടുത്ത് അതില്‍ ജൈവമാലിന്യങ്ങള്‍ നിക്ഷേപിക്കുക എന്നതാണ് കുഴി കമ്പോസ്റ്റുകൊണ്ട് ഉദ്ദേശിക്കുന്നത്. വളരെക്കാലങ്ങള്‍ക്ക് മുമ്പു തന്നെ ആരംഭിച്ച മാലിന്യ സംസ്‌കരണ മാര്‍ഗമാണിത്. മാലിന്യങ്ങള്‍ കുഴിയിലേക്ക് തള്ളുന്നതിന് മുന്‍പ് ഒരു മൂന്ന് സെന്റീമീറ്റര്‍ കനത്തില്‍ ചാണകം നിക്ഷേപിക്കുക, തുടര്‍ന്ന് ഓരോ തവണയും മാലിന്യങ്ങള്‍ കുഴിയിലേക്ക് എറിഞ്ഞ് മുകളില്‍ കുറച്ച് മണ്ണ് വിതറുക, ഇടയ്ക്കിടെയായി ചാണകപ്പൊടി കുഴിയില്‍ വിതറുക. കുഴി നിറഞ്ഞ് വരുമ്പോള്‍ ആറ് ഇഞ്ച് കനത്തില്‍ മണ്ണിട്ട് കുഴിമൂടുകയും ചെയ്യുക. 4 മുതല്‍ 6 മാസത്തിനുള്ളില്‍ തന്നെ ഇവ ജൈവകമ്പോസ്റ്റ് വളമായി മാറിയിരിക്കും, ഇവ ചെടികള്‍ക്ക് കീഴെ വിതറി അവയ്ക്ക് വളം ചെയ്യാവുന്നതാണ്.

മോസ്പിറ്റ് കമ്പോസ്റ്റിംഗ് (Mozpit Composting)

എളുപ്പത്തില്‍ അടയ്ക്കുകയും തുറക്കുകയും ചെയ്യുന്ന കോണ്‍ക്രീറ്റ് അടപ്പോടുകൂടിയ കുഴി നിര്‍മിച്ച് മാലിന്യം സംസ്‌കരിക്കുന്ന പരിപാടിയാണ് മോസ്പിറ്റ് കമ്പോസ്റ്റിംഗ്. കോണ്‍ക്രീറ്റ് സ്ലാബിന്റെ മധ്യത്തായി 45 സെന്റീമീറ്റര്‍ നീളത്തില്‍ മുറിച്ചെടുത്ത പൈപ്പ് സ്ഥാപിക്കുക. ആ പൈപ്പിലൂടെ മാലിന്യം കുഴിയിലേക്ക് നിക്ഷേപിക്കാം. മാലിന്യം നിക്ഷേപിക്കുന്നതിന് മുമ്പായി ചാണകപ്പൊടി നിക്ഷേപിക്കുകയും ഇടയ്ക്കിടെ ചാണകം കലക്കി ഒഴിക്കുകയും ചെയ്യുകയാണ് വേണ്ടത്. ഇത് മാലിന്യങ്ങള്‍ ജീര്‍ണ്ണിക്കുന്നത് ത്വരിതപ്പെടുത്തും.

മണ്ണിര കമ്പോസ്റ്റിംഗ് (Vermi Composting)

ഏറ്റവും നല്ല ജൈവവളമാണ് മണ്ണിര കമ്പോസ്റ്റിംഗ്. ടെറാക്കോട്ട, ഫൈബര്‍ റീ ഇന്‍ഫോഴ്‌സ് പ്ലാസ്റ്റിക് എന്നിവ ഉപയോഗിച്ച് സാമാന്യം വലിപ്പത്തിലുള്ള ബേസിനുകള്‍ നിര്‍മ്മിക്കുക എന്നതാണ് മണ്ണിര കമ്പോസ്റ്റിംഗിന്റെ ആദ്യഘട്ടം. ഇങ്ങനെ നിര്‍മ്മിച്ച ബേസിനില്‍ ആദ്യം ചകിരിനാര് വിരിച്ച് അതില്‍ ചാണകപ്പൊടി വിതറുകയും ചെയ്യണം. തുടര്‍ന്ന് അതിലേക്ക് EUDRILLUS EUGINEAE എന്ന വിഭാഗത്തിലുള്ള 200 മണ്ണിരകളെ നിക്ഷേപിക്കുക. ഈ ബേസിനില്‍ മാലിന്യം ചെറിയ കഷണങ്ങളാക്കിയാണ് നിക്ഷേപിക്കേണ്ടത്. ബേസിനുകള്‍ ചണച്ചാക്കുപയോഗിച്ച് അടച്ചുവെച്ച് ഇടയ്ക്കിടെ വെള്ളം തളിക്കുകയും ചെയ്യുക. ഇത്തരത്തില്‍ ഒന്നില്‍ക്കൂടുതല്‍ ബേസിനുകള്‍ നിര്‍മ്മിച്ച് ഒന്നിനുശേഷം മറ്റൊന്നിലേക്ക് എന്ന രീതിയില്‍ മാലിന്യം നിക്ഷേപിക്കുക. രണ്ടാമത്തെ ബേസിന്‍ നിറയുമ്പോഴേക്കും ആദ്യ ബേസിനില്‍ നിക്ഷേപിച്ച മാലിന്യം ഉത്തമമായ വെര്‍മി കമ്പോസ്റ്റായി മാറിയിരിക്കും. വളം എടുക്കുന്നതിന് മുന്നോടിയായി ചണച്ചാക്കുകള്‍ നീക്കി ബേസിനിലേക്ക് സൂര്യപ്രകാശം പതിപ്പിക്കുക. ഈ ഘട്ടത്തില്‍ മണ്ണിരകള്‍ കുഴിയുടെ അടിഭാഗത്തേക്ക് വലിയും അപ്പോഴാണ് ബേസിനില്‍ നിന്ന് വളം നീക്കം ചെയ്ത് വീണ്ടും മാലിന്യം നിക്ഷേപിച്ചു തുടങ്ങാം.

ബയോഗ്യാസ് പ്ലാന്റ്

പോര്‍ട്ടബിള്‍ ഫൈബര്‍ റീ ഇന്‍ഫോഴ്‌സ്ഡ് പ്ലാസ്റ്റിക് (എഫ് ആര്‍ പി) ടാങ്കുകള്‍ ഉപയോഗിച്ച് ഓക്‌സിജന്റെ അഭാവത്തില്‍ മാലിന്യം സംസ്‌കരിക്കുന്ന അനറോബിക് സംവിധാനമാണ് ബയോഗ്യാസ് പ്ലാന്റ്. പാചകവാതകത്തോടൊപ്പം വളമായി ഉപയോഗിക്കുന്ന സ്ലറിയും ലഭിക്കുന്നു എന്നതാണ് ഈ മാലിന്യസംസ്‌കരണ പ്ലാന്റിന്റെ പ്രത്യേകത. അഞ്ച് അംഗങ്ങളുള്ള ഒരു കുടുബത്തിന് 0.5 ഘന മീറ്റര്‍ വ്യാപ്തിയുള്ള ഒരു യൂണിറ്റാണ് ആവശ്യമായി വരുന്നത്. ആരംഭത്തില്‍ രണ്ടോ മൂന്നോ കുട്ട ചാണകം കലക്കി ഡൈജസ്റ്ററില്‍ ഒഴിക്കുക തുടര്‍ന്ന് മാലിന്യങ്ങള്‍ ചെറിയ കഷണങ്ങളാക്കി നുറുക്കി ഒരു കിലോഗ്രാമിന് ഒരു ലിറ്റര്‍ വെള്ളം ചേര്‍ത്ത് പ്ലാന്റില്‍ ഒഴിക്കുക. മുട്ടത്തോട്, നാരങ്ങ, ഓറഞ്ച്, അച്ചാര്‍, കീടനാശിനികള്‍, സോപ്പുവെള്ളം, അജൈവമാലിന്യങ്ങള്‍ മുതലായവ പ്ലാന്റില്‍ നിക്ഷേപിക്കരുത്.

മാലിന്യ സംസ്‌കരണത്തിന് പുതിയ മാതൃകകള്‍ തയ്യാറാക്കി ജനങ്ങളുടെ മുന്നില്‍ അവതരിപ്പിക്കാന്‍ ശുചിത്വമിഷന്‍ പോലുള്ള സംരഭങ്ങള്‍ മുന്നോട്ടു വരുന്നുണ്ട്. ഇത്തരം മാലിന്യ പ്ലാന്റുകളുടെ നിര്‍മ്മാണത്തിനാവശ്യമായ ധനസഹായം നല്‍കാന്‍ സംസ്ഥാന സര്‍ക്കാരും മുന്നോട്ടു വന്നിട്ടുണ്ട്. സംസ്ഥാന കാര്‍ഷികവികസന ക്ഷേമ വകുപ്പിന്റെ കേരള കര്‍ഷകന്‍ മാഗസിനിലെ ലേഖനത്തെ ആസ്പദമാക്കി തയ്യാറാക്കിയ റിപ്പോര്‍ട്ട്.

Also Read: ഗ്രോബാഗ് കൃഷി രീതിയും കീടനിയന്ത്രണവും