കേരളത്തില്‍ സാധ്യതകള്‍ കണ്ടെത്തുന്ന കരിങ്കോഴി വളര്‍ത്തല്‍

ലോകത്താകെയുള്ള ഇരുനൂറിലധികം വരുന്ന കോഴിയിനങ്ങളില്‍ മുട്ടയ്ക്കയും ഇറച്ചിയ്ക്കായും ഈ രണ്ട് ഗുണങ്ങൾ കോർത്തിണക്കിയും അലങ്കാരത്തിനുമൊക്കെയായാണ് ഓരോ സ്ഥലങ്ങളിലും കോഴികളെ വളര്‍ത്തുന്നത്. ഇന്ത്യയിൽ കണ്ടുവരുന്ന പ്രധാന നാടൻ കോഴിയിനങ്ങളാണ് തലശ്ശേരി, തിത്തിരിക്കോഴികൾ, നേക്കഡ് നെക്ക്, കടക്ക്നാഥ്‌, അസീൽ, നിക്കോബാറി, മിറി എന്നിവ. ഇവയിൽ തലശ്ശേരിക്കോഴികൾ പൂർണ്ണമായും കേരളത്തിൽ ഉത്‌ഭവിച്ചവയും നേക്കഡ് നെക്ക് എന്ന ഇനം കേരളത്തിൽ വ്യാപകമായി കണ്ടുവരുന്നതുമാണ്. ഇടക്കാലത്തായി കേരളത്തിലെ നാടന്‍ കോഴിയിനങ്ങളെ വെല്ലുന്ന രീതിയില്‍ പ്രസിദ്ധി നേടിക്കഴിഞ്ഞ ഒരു നാടൻ ജനുസ്സാണ് “കടക്ക്നാഥ്” അഥവാ “കാലാമഴി” എന്ന വിളിപ്പേരുള്ള “കരിങ്കോഴി.”

കരിങ്കോഴിയുടെ ഉത്ഭവം മധ്യപ്രദേശിൽ നിന്നാണ്. മധ്യപ്രദേശിലെ ദിൽ, ദിലാല എന്നീ ആദിവാസി ഊരുകളിലും ജാബുവ, ധാർ എന്നീ ജില്ലകളിലും ഇവയെ വ്യാപകമായി വളര്‍ത്തുന്നത്. ഗുജറാത്ത്, രാജസ്ഥാൻ എന്നീ അയൽ സംസ്ഥനങ്ങളിലും നടൻ ഇനമായ കരിങ്കോഴി ധാരാളമായി ഉണ്ട്. കടക്ക്നാഥ്‌ പോലെ ഒരു ഇനം കോഴി ഇന്തോനേഷ്യയിലും ഉണ്ട്. “അയം സിമാനി” എന്ന പേരിലാണ് ഇന്ത്വാനേഷ്യയില്‍ ഈ കോഴിയിനം അറിയപ്പെട്ടുന്നത്. ഉയർന്ന പ്രതിരോധശേഷി, മാംസ്യത്തിനും മുട്ടയ്ക്കും ഉള്ള സ്വീകാര്യത, ചുരുങ്ങിയ തീറ്റച്ചിലവ്, ഉയർന്ന മാതൃത്വഗുണം എന്നിവ കരിങ്കോഴി ഇനങ്ങളുടെ പ്രത്യേകതയാണ്. എന്നാൽ കർശനമായ ജനിതകസംരക്ഷണ പ്രവർത്തനങ്ങളുടെ അഭാവം കരിങ്കോഴി ഉൾപ്പെടെ പല നാടൻ ഇനങ്ങളും എണ്ണത്തിൽ എന്ന് അപകടകരമാം വിധം കുറവുണ്ടായിട്ടുണ്ട്. കേരളത്തിൽ കാണപ്പെടുന്ന നാടൻ കോഴികളുടെ എണ്ണത്തിലും ഈ കുറവ് പ്രകടമായിട്ടുണ്ട്. കരിങ്കോഴികളുടെ കാര്യത്തിൽ സ്ഥിതി കുറെ ആശ്വാസകരമാണ്.

Also Read: ഇറച്ചിക്കോഴി വ്യവസായം: വിപണന സാധ്യതകളും പ്രതിസന്ധിയും

സാധാരണ നാടൻകോഴിയുടെ ഗുണങ്ങളേക്കാൾ ഉപരി ചില പ്രത്യേകതകൾ കരിങ്കോഴികൾക്ക് ഉള്ളതായി പറയപ്പെടുന്നു. മറ്റു കോഴികളെ അപേക്ഷിച്ചു കരിങ്കോഴി ഇറച്ചിയിൽ മാംസ്യം (പ്രോട്ടീൻ) അധികമാണെന്നും കൊളസ്‌ട്രോൾ തുലോം കുറവാണെന്നും പഠനങ്ങൾ സാക്ഷ്യപ്പെടുത്തുന്നു. കൂടാതെ വിവിധ തരം അമിനോ അമ്ലങ്ങൾ, ബീറ്റാ കരോട്ടിൻ, ബി കോംപ്ലക്സ്, ലെസിത്തീൻ, ഒമേഗ ഫാറ്റി ആസിഡ്സ് എന്നിവയുടെ കാലവറയുമാണ് കരിങ്കോഴിയുടെ മാംസ്യം. ആയതിനാലാകണം ഇതിന്റെ മാംസം വ്യാപകമായി ആയുർവേദ മരുന്ന് നിർമ്മാണത്തിന് ഉപയോഗിച്ച് വരുന്നത്. കൊളസ്‌ട്രോളിന്റെ അളവ് കുറവായതിനാൽ കരിങ്കോഴിയുടെ മാംസം ഹൃദ്രോഗികൾക്കും ഉപയോഗിക്കാവുന്നതാണ്. കരിങ്കോഴിയുടെ മാംസം ശരീരത്തിലെ രക്തയോട്ടം, പുരുഷൻമാരിലെ ലൈംഗീക ശേഷി തുടങ്ങിയവ വർദ്ധിപ്പിക്കുന്നതിനും സ്ത്രീകളിലെ വന്ധ്യത പരിഹരിക്കുന്നതിനും ഉപയോഗിക്കുന്നതായി ശാസ്ത്രീയമായി തെളിയിക്കപ്പെടാത്ത പല അവകാശവാദങ്ങളും നിലനില്‍ക്കുന്നുണ്ട്. ശാസ്ത്രീയ പരീക്ഷണങ്ങളും പഠനങ്ങളും കൂടുതലായി നടന്നാൽ മാത്രമേ ഈ വാദങ്ങളുടെ ആധികാരികത നമുക്ക് ഊട്ടിയുറപ്പിക്കാൻ കഴിയൂ. പക്ഷേ, ഇത്തരം പ്രചരണങ്ങൾ ഈ ഇനം കോഴികളുടെ വിപണി സാധ്യത ഇപ്പോഴേ വർദ്ധിപ്പിച്ചു കഴിഞ്ഞു.

ഇന്ന് കേരളത്തിൽ പല കർഷകരും ലാഭകരമായി കരിങ്കോഴി ഫാം നടത്തുന്നുണ്ട്. ഇവയ്ക്കു ലഭിക്കുന്ന മോഹവില തന്നെയാണ് കൂടുതൽ ആളുകളെ ഇതിലേക്ക് ആകർഷിക്കുന്ന ഘടകം. വ്യവസായികമായുള്ള മുട്ടക്കോഴി വളർത്തൽ അത്രയധികം ലാഭകരമല്ലാത്ത കേരളത്തിൽ കരിങ്കോഴി, മറ്റ് അലങ്കാര കോഴികൾ വളർത്തൽ എന്നിവ മൃഗസംരക്ഷണ മേഖലയിൽ പുത്തൻ ഉണർവാണ് നൽകുന്നത്. കൂടാതെ അടുക്കള അവശിഷ്ടങ്ങളും പാഴായിപ്പോകുന്ന ആഹാര സാധനങ്ങളും ഫലപ്രദമായി ഉപയോഗിക്കാനാകുമെന്നതും അടുക്കളത്തോട്ടത്തിനും പൂന്തോട്ടത്തിനുമുള്ള ജൈവ വളലഭ്യത വർദ്ധിക്കുന്നു എന്നതും നാടൻകോഴി വളർത്തലിന്റെ ഗുണങ്ങളാണ്. ചികഞ്ഞു തീറ്റതേടുന്ന ഇത്തരം കോഴികൾ കീടങ്ങളെ തിന്നു നശിപ്പിക്കുകയും മണ്ണിന് ഇളക്കമുണ്ടാക്കി ജലസംഭരണ ശേഷി വർദ്ധിപ്പിക്കുകയും ചെയ്യുന്നു. ആയതിനാൽ ഇത്തരത്തിലുള്ള നാടൻ കോഴികളുടെ ജനിതക സംരക്ഷണം കാലഘട്ടത്തിന്റെ ആവശ്യം കൂടിയാണ്.

(കേരള കര്‍ഷകന്‍ മാസികയില്‍ പ്രസിദ്ധീകരിച്ച ലേഖനത്തിന്റെ പുന:പ്രസിദ്ധീകരണം.)

Picture Courtesy: indiamart.com

Dr. Harikrishnan S

Assistant Professor, Department of Poultry Science, Veterinary University